पुणे : ‘लायन’ या हॉलिवूड चित्रपटात सनी पवार हा मराठमोळा बालकलाकार मुख्य भूमिकेत झळकला होता. हाच सनी आता आगामी ‘अ ब क’ या मराठी चित्रपटातून मराठी चित्रपटसृष्टीत पदार्पण करत आहे. या चित्रपटात सनी मुख्य भूमिकेत असून, ‘हरी’ ही व्यक्तिरेखा साकारताना आपणाला तो दिसेल.
‘लायन’ चित्रपटाने ऑस्करपर्यंत धडक मारली होती. सत्यघटनेवर आधारित असलेल्या चित्रपटात सनीने ‘शेरू’ ही व्यक्तिरेखा साखरली होती. त्याने साकारलेली शेरूची भूमिका जगभरात गाजली होती व हा चित्रपट ऑस्करवारीत असल्याने सनीच्या अभिनयाचे विशेष कौतुक झाले होते. त्याला अभिनयासाठी ‘दी रायझिंग स्टार’ हा पुरस्कार देऊन काही महिन्यांपूर्वी लंडनमध्ये सन्मानित करण्यात आले होते. त्या वेळी बराक ओबामा, रॉक, सचिन तेंडुलकर अशा अनेक मान्यवरांनी त्याचे विशेष कौतुक केले होते.
सनी सध्या चौथीमध्ये शिकत आहे. ग्रॅव्हेटी एंटरटेन्मेंट व गोल्डन ग्लोब प्रस्तुत आणि मिहीर कुलकर्णी निर्मित असलेल्या ‘अ ब क’ या चित्रपटाचे दिग्दर्शक रामकुमर शेडगे हे असून, लेखन आबा गायकवाड यांचे आहे. चित्रपटाची गीते गुरू ठाकूर यांनी लिहिली असून, सरकार राज, रक्तचरित्र, भूत अशा अनेक चित्रपटांचे संगीतकार बापी-तुतल हे ‘अ ब क’ला संगीत देणार आहेत. राष्ट्रीय पुरस्कारविजेते कॅमेरामन महेश आणे चित्रपटाचे कॅमेरामन असून, सनी पवारसह तमन्ना भाटिया, सुनील शेट्टी असे अनेक दिग्ग्ज कलावंत या चित्रपटात काम करणार आहेत. या चित्रपटाचे वैशिष्ट्य असे, की हा चित्रपट एकाच वेळी मराठी, हिंदी, इंग्रजी, तमीळ, तेलुगू अशा पाच भाषांत निर्माण होणार आहे. या चित्रपटासाठी अमृता देवेंद्र फडणवीस पार्श्वगायन करणार आहेत. चित्रपटाचे निर्माते मिहीर कुलकर्णी व दिग्दर्शक रामकुमार शेडगे यांनी ही माहिती दिली.